RSS Feed

Ek is terug……

Posted on

5 Jaar terug het ek hierdie geskryf: https://gedagtes.wordpress.com/2012/03/15/ek-het-geval/ , genade maar die tyd het omtrent gestap.

Soooo baie het in hierdie 5 jaar gebeur. Beste van alles ek en my blouoog is nogsteeds saam en ons 6jaar herdenking is een van die dae – jippeeee hoeraa!!!!

Hy en my seun kom uitstekend oor die weg, hulle het nou n sterk band al is hulle nie bloed pa en seun nie. Hulle doen dinge saam soos wat n pa en seun sal doen. My seun het hom baie maal nou al in trane gehad – van trots, op spesiale dae soos vadersdag en sommer net omdat hy weet hy het nie n kind van sy eie nie.

My seun doen nog steeds gimnastiek met sy fokus op trampoline, en het groot drome, waarvan die eerste groot een is om volgende jaar aan die World Championships deel te neem.

Ek gaan probeer om hoogtepunte hier te gee:

2012 – Ek en die liefde van my lewe begin weer n paadjie stap. My seun is gereed vir n man in ons lewe.

2013 – Seun leer baie by liefie en hulle band word sterker en sterker.

2014 – Ek en liefie besluit om saam in te trek – tog net goedkoper om een huishouding te hê en nie twee nie. Seun speel die Verlore Seun tydens die skool se Passiespele. Ook die jaar wat seun klaar maak met Laerskool.

2015 – So begin n nuwe era vir ons met seun wat Hoërskool begin. Ek skuif hom ook na n ander gimnastiek klub met n great trampoline afrigter. ‘n Skuif wat ek eintlik lank terug moes gemaak het.

2016 – Seun kry die trofee vir beste Senior Euro Trampoline tydens die VS Prestige Prysuitdeling. Hy word ook gekies vir die SA span wat in Zimbabwe gaan deelneem en daar wen hy silver vir Euro en goud vir Dubble-Mini.

2017 – Ons kry die kans om n huis naby die rivier te kry  en ons begin ons volgende avontuur om ‘n entjie buite die stad te bly en die rustigheid van die natuur elke dag te kan beleef. Voel of ons elke dag in die bosveld wakker word :-).  Seun kry die trofee vir beste Senior Dubble-Mini tydens die VS Prestige Prysuitdeling asook n trofee vir sy deelname in Zimbabwe. Hy word tydens die SA Gym Games weer gekies vir die SA span wat Desember in Walvisbaai gaan deelneem.

Volgende vertel ek van die nuwe verwikkelinge wat ons beplan.

 

 

 

Advertisements

Canvas…. en ‘n eerste vir my.

Posted on

Hierdie was die eerste keer wat ek op canvas gewerk het en beslis iets wat ek meer gaan gebruik.

My kollega het vreeslik hiervan gehou en gevra ek moet vir haar ook een maak wat sy as geskenk vir iemand wil gee. Dit was die eerste keer dat iemand iets wou koop wat ek maak.

Hierdie het ek vir haar gemaak.

Ek sien natuurlik heelwat foute, maar is bly dat sy ten minste tevrede is! 🙂

Ek het geval……..

Posted on

Hierdie val saam met die laaste keer wat ek iets geplaas het in 2009 https://gedagtes.wordpress.com/2009/10/21/368/

Ek dink tog die Here het ‘n plan gehad – ek glo dis Sy beplanning dat na 2 jaar waarin daar geen kontak was ons paaie weer moes kruis.

As ek nou terug kyk weet ek dat ek dalk toe gereed was, maar my seun was beslis nie gereed vir daardie stap nie. Nou glo ek is hy gereed. Hy het iemand met wie hy manne-goed kan praat, saam met wie hy kan visvang en dinge doen wat hierdie mamma nie voor kans sien nie.

Ek het weereens geval vir hom, en al voel ek party dae onseker oor waarheen vorentoe, weet ek die Here loop saam met ons en as dit moet wees, dan sal dit!! Elke keer wat daardie blou oë in myne kyk val ek verder… met elke aanraking val ek….

Ek het lanklaas so gemaklik by iemand gevoel, veilig, gebonde! Ons deel soveel belangstellings, praat baie, maar het ook heerlike rustige tye bymekaar.

Laat U wil geskied Heer!!

 

 

Waar is die kamera???

Posted on

Gister hardloop ek en seun gou by PnP in om net ‘n paar goedjies te kry. Nodeloos om te sê dat die winkel ‘n absolute malhuis was, was mos einde van die maand!

Die rye is lank, baie lank en ek loop maar en soek vir ‘n korter ry, waar nie trollies is wat oorloop nie. Ek is gelukkig en kry ‘n kort ry, almal met mandjies en daar is net 3 persone voor my – my lucky day!!

Toe nie!!! Toe die vrou wat voor my staan voor kom, kom haar man van iewers af met……… ‘n trollie!!! Wat natuurlik ook oorloop!

Ek kon dit nie glo nie – het nie geweet wat om te dink nie, en het gewonder waar is die kamera ( ek was seker hierdie was een of ander grap wat nou op film vasgelê word), want hierdie kan mos nie regtig gebeur nie??? Die mense agter my en in die rye langs my het almal hulle opinie gelug, en ons is almal net aangegluur deur die man en vrou!

Nota aan self: Maak seker van die datum voor jy sommer net vinnig by die winkel wil in hardloop 🙂

Kreatiwiteit

Posted on

My laaste projek wat ek aangepak het lyk so:

Ek het tokreen gebruik en my seun se babaskoentjies! Lekker morsige spul, maar dit was heerlik.

My volgende tokreen projek sal my balletskoene wees! 🙂

Ek sal soos ek met iets klaar maak, dit op my kunswerke bladsy laai.

E

Ouma

Posted on

2 Jaar terug vandag het Liewe Jesus hierdie pragtige mens kom haal, sonder enige waarskuwing vooraf!

Dis Ouma Pollie, my oumie – my sh…ss(ons troetelnaam vir mekaar)!

Oumie was my beste vriendin, ek kon haar enigiets vertel en sy sou help met raad en daad waar sy kon. Ons het ‘n gedeelde seer gehad, iets wat ons twee baie nader na mekaar laat groei het. Ons het baie gesels, gelag, saam gehuil…..

Oumie het jou altyd as jy verjaar net voor 6 in die oggend gebel en so was dit ook op 15 Februarie 2010, min wetende dat dit die laaste keer sou wees wat ek met haar sou praat en ook die laaste keer wat sy my ‘n gelukkige verjaarsdag sal toewens.

Die skok was so groot… ek wou dit nie glo nie, ek het dan net die vorige dag met haar gepraat en dit het goed gegaan met haar, sy was gesond?! ‘n Stukkie van my hart is daardie oggend uitgeruk – na 2 jaar is dit nog vreeslik moeilik. As ek van oumie praat, is dit met ‘n traan in die oog!

Daar is soooo baie wat ek van haar onthou: Oumie was ryklik geseën met 10 kleinkinders, en sy het elkeen van hulle dieselfde behandel en ons almal oorlaai met tonne liefde!

Ek onthou al die grappies as die familie bymekaar was: My pa was sommer Johannes genoem, wat nooit iets verkeerd kon doen nie :-); Oom Peet is altyd mooi vertel om net nie die bottels (borrels) konfyt ens te vergeet as hulle gaan kuier nie… Oumie het altyd so lekker gelag as Oom Marius die spreekwoordelike pot roer…. Oumie het baie maniertjies gehad, maar een wat sy baie gedoen het as sy geweet het dat sy nou mooi moet dink, was as sy haar hand so oor haar voorkop gevryf het – dit was nou as sy almal wat by die geskerts betrokke was, se aandeel probeer verdedig het…. Daar is nog soveel meer wat almal van ons onthou!

Of oumie se sêding: ‘Ek sal regkom, help my net.’ 🙂 Ai daar is soveel memories – goeie memories!

Oumie het nooit gekla nie, sy was altyd reg om te help – bekend of onbekend. Haar hand en hart was oop vir almal!

Ek mis jou vreeslik baie oumie en jy het ‘n leemte gelaat in die lewens van ons 26 ander wat agtergebly het en ook al oumie se vriende.

Ons sal oumie nooit vergeet nie!!

Ek is terug!!! :-) – Valentine’s Dag…

Posted on

Ek was lank – baie lank afwesig van my blog, maar ek is terug en daar is soveel wat ek kan vertel wat in die laaste twee jaar gebeur het. Dit sal ek maar so met verloop van tyd doen.

Ek kook gisteraand eiers vir my en seun, en dis toe so ironies dat die aand voor Valentine’s dag die een se wit uitloop en die hartjie vorm! Ek dink dit is WOW!!

Gelukkige Valentine’s dag vir almal van julle!!

E